દેશભક્તિ શક્તિ છે.

ॐ श्री पृथ्वीयै नमः

ઇષ્ટદેવની ભક્તિથી જેટલી ઊર્જા મળે છે. આરતી, ભજન,પૂજા, સત્સંગ, નમાજ, ઈબાદત વિગેરેથી જે ઊર્જા મળે છે, તેવી જ ઊર્જા દેશભક્તિથી પણ મળે છે.
કોઈ ધર્મ કે ઇષ્ટદેવતા માટે કોઈએ પણ કુરબાની આપી હોય તેવું ભાગ્યે જ સાંભળવા મળ્યું હશે પરંતુ કોઈ દેશભક્ત દેશ માટે જીવન કુરબાન કરવા માટે એક ક્ષણ પણ નથી વિચારતો. એટલે સાચે જ દેશભક્તિમાં એક શક્તિ રહેલ છે, અપાર શક્તિ.
જેવી રીતે એક નિરોગી શરીર માટે ત્રણ પરિબળો કામ કરે છે. જેવા કે વાત, પિત્ત અને કફ. આ ત્રણેયનું સંતુલન જરૂરી છે, તેવી જ રીતે એક વિકસિત દેશ માટે પણ ત્રણ મુખ્ય પરિબળો કામ કરે છે. પ્રથમ તો દેશને માણવા માટે સ્વચ્છ રાખવો; બીજું, વાહનવ્યવહારને પણ આપણા સામાજિક વ્યવહાર જેટલું જ મહત્વ આપવું અને ત્રીજું પરિબળ જે આપણા દેશને ઊધઈની જેમ કોરી ખાય છે તે છે ભ્રષ્ટાચારનો નાશ કરવો.
સૌ પ્રથમ ભક્તિ દેશભક્તિ જ છે, સવારે ઉઠતાની સાથે જ જે ધરતી ઉપર આપણે પગ મુકીયે છીએ એ માતૃભૂમિની સેવા અને સાધના આપણો પ્રથમ ધર્મ છે. એની ભક્તિમાં જ શક્તિ છે.
ભારતમાતા એ તો કંઠી, તાવીજ, નાડાછડી, કડુ કે રક્ષાપોટલી જેવું કંઈ બાંધ્યું નથી, એ તો અવિરત અખૂટ સુવિધાઓ આપ્યા જ કરે છે. જેને સાચવવી આપણું કર્તવ્ય છે. ગીતા, બાઇબલ, કુરાન, શિક્ષાપત્રી જેવા પવિત્ર ગ્રંથોને માન આપવાનું પ્રથમ પગથિયું એ આપણી માતૃભૂમિનું સંવર્ધન અને સાચવણી.
દેશભક્તિમાં જે અતૂટ સંતોષ છે, એમાં દિવ્ય ઊર્જા છે, માટે જ,
દેશભક્તિ શક્તિ છે.
દેશભક્તિ શક્તિ છે.
દેશભક્તિ શક્તિ છે.

-મૌલિક “વિચાર”